Në Itali, një vend me tradita të pasura kulturore dhe familjare, liria për të zgjedhur emrin e një fëmije po kufizohet me dispozita të reja ligjore që kanë shkaktuar debat në opinionin publik. Qeveria e drejtuar nga kryeministrja Giorgia Meloni ka miratuar një akt të ri ligjor që ndalon regjistrimin e emrave që nuk përputhen me “traditën kombëtare dhe binarizmin gjinor”. Prindërit që thyejnë këtë rregull mund të përballen me gjoba që kalojnë vlerën e 1,000 eurove.
Ky vendim pasoi rastet e shumta kur qytetarët italianë zgjidhnin emra jo të zakonshëm, neutralë në gjini apo ndërkombëtarë, të cilët nuk përputhen me modelet tradicionale italiane. Rregullat e reja ndalojnë për shembull emrat si Andrea për vajzat (edhe pse në gjuhë të tjera mund të jetë emër femëror), ose emra që nuk mund të kategorizohen qartë si mashkullor apo femëror.
Për shumë prindër, ky kufizim përfaqëson një ndërhyrje të panevojshme në një vendim thellësisht personal dhe emocional. Shteti tashmë nuk lejohen vetëm limitime administrative, por imponon norma kulturore dhe gjinore në një shprehje intime të identitetit të fëmijës dhe familjes. Kritika është përqendruar në faktin që masat shihen si pjesë e një lëvizjeje konservatore më të gjerë që synon të rikthejë vlerat tradicionale dhe kontroll më të madh mbi çështjet personale.
Ndërkohë, aktivistë dhe organizata të të drejtave të njeriut shprehin shqetësim se kjo qasje mund të shkelë të drejtat themelore të individit për të vetëpërcaktuar identitetin e tij. Ligji i ri e bën Italinë një ndër vendet me kufizimet më të forta mbi emërtimin personal në Evropë.
