Analisti politik nga organizata Demokracia Plus, Emir Abrashi, ka ngritur shqetësimin se kryeministri në detyrë, Albin Kurti, ka vënë interesat e veta partiake përpara atyre kombëtare, në kontekstin e bllokimit të konstituimit të Kuvendit të ri të Kosovës. Në një intervistë për “Balkan Update” në ABC News, Abrashi theksoi se nuk ka pasur asnjë përpjekje të sinqertë nga ana e liderit të Lëvizjes Vetëvendosje për të përmbyllur këtë proces të rëndësishëm institucional.
Sipas Abrashit, Vetëvendosje po e zvarrit qëllimisht zgjedhjen e kryetarit të Kuvendit për të krijuar terren për zgjedhje të reja parlamentare, të cilat mund të mbahen në verë ose në vjeshtë. Kjo strategji, sipas tij, synon të sigurojë një pozitë më të favorshme numerike në një qeveri të ardhshme “Kurti 3”. Ai e cilësoi këtë qasje si një akt që shkel interesin e qytetarëve dhe stabilitetin institucional të vendit.
Ndërkohë, Abrashi vuri në dukje edhe rolin e opozitës në këtë bllokadë. Sipas tij, partitë opozitare nuk janë dakord me kanditaturën e Albulena Haxhiut për postin e kryetares së Kuvendit, gjë që ka krijuar një klimë thellësisht konfrontuese që po e mban peng funksionalizimin e institucionit më të lartë legjislativ në Kosovë.
Kjo situatë rrezikon të thellojë krizën politike në vend dhe të minojë besimin e qytetarëve në proceset demokratike. Në një kohë kur Kosova përballet me sfida të mëdha si në arenën e brendshme ashtu edhe atë ndërkombëtare, analiza e Abrashit shërben si një alarm për nevojën e reflektimit politik dhe kompromisit institucional.
