Është rikthyer me një vendosmëri të admirueshme dhe formë brilante. Marash Kumbulla po shkëlqen këtë sezon në La Liga me fanellën e Espanyol-it, duke i surprizuar të gjithë skeptikët që e kishin lënë jashtë parashikimeve pas dëmtimit serioz të ligamenteve të gjurit. Pas një mungese të gjatë, mbrojtësi shqiptar është rikthyer më i fortë se kurrë, dhe paraqitjet e tij të fundit flasin vetë: lidership në mbrojtje, leximi i lojës dhe një qetësi teknike që rrallë shihet.
Espanyol, që e mori në formë huazimi nga Roma verën e kaluar, nuk e kishte menduar që lojtari do të bëhej kaq shpejt një pikë kyçe e formacionit. Por tani, si katalanasit, ashtu edhe Roma, janë vënë në mendime. Espanyol dëshiron ta mbajë, por Roma është e tunduar ta rikthejë, sidomos pas sfidave të fundit në repartin defensiv.
Interesi pritet të rritet edhe më shumë me afrimin e verës, me spekulimet që lidhin emrin e Kumbullës edhe me Barcelonën, që është në kërkim të alternativave të reja në qendër të prapavijës. Një lëvizje e tillë do të ishte një hap i madh për mbrojtësin kuqezi, por edhe konfirmim i potencialit të tij elitar.
Kumbulla nuk është më thjesht një talent i premtuar – ai është një realitet në rikthim, që ka fituar respektin në Spanjë dhe vëmendjen e klubeve të mëdha. Në mes të Romës dhe Barcelonës, vendimi për të ardhmen e tij po kthehet në një nga diskutimet më interesante të merkatos verore.
