Kryetari i Partisë Socialiste, Edi Rama, zhvilloi një takim elektoral në njësinë 6 në Tiranë dhe në zonën e Kasharit, ku theksoi nevojën për investime më të mëdha në infrastrukturën arsimore për fëmijët. Rama u ndal në veçanti te zonat e Astirit dhe Kasharit, duke theksuar se këto lagje periferike kanë mbetur pas në raport me nevojat e fëmijëve për shkolla, çerdhe dhe kopshte moderne.
Ai u zotua se qeveria do të ndërhyjë për të ndërtuar institucione arsimore të standardeve europiane në këto zona, duke ndjekur shembullin e Tiranës, Durrësit dhe Lezhës, që kanë përfituar në vitet e fundit shkolla të reja dhe moderne.
Në fjalën e tij, Rama u ndal edhe te problematika e territoreve të zëna ilegalisht me tra apo ndarje të padrejta të hapësirave publike. “Individë të caktuar vënë tra dhe rrethojnë zona, duke krijuar pasiguri dhe pengesë për komunitetin. Ne do t’i pastrojmë këto territore,” deklaroi ai. Sipas Ramës, çdo hapësirë komunitare, si vendparkimet apo ambjentet e përbashkëta, duhet të përdoret vetëm me aprovimin e komunitetit dhe sipas rregullores.
Ai bëri thirrje për mbështetje më 11 maj, duke theksuar se këto zgjedhje nuk janë vetëm për të zgjedhur përfaqësues, por një “takim me historinë” që duhet të japë një sinjal të qartë politik për hapjen e negociatave me BE-në. Mesazhi i tij ishte i qartë: komuniteti ka nevojë për më shumë vëmendje, veçanërisht për gjeneratën e re dhe mjediset ku ajo rritet.
