Një reportazh i fundit i gazetës prestigjioze gjermane “Der Standard”, shkruar nga gazetari Dominik Straub, ka hapur debat të gjerë në lidhje me një praktikë të re të Qeverisë italiane të udhëhequr nga Giorgia Meloni. Artikulli trajton zhvendosjen e emigrantëve me dosje kriminale nga Italia drejt një kampi të vendosur në Shqipëri, në përpjekje për të lehtësuar ngarkesën mbi strukturat e migracionit në vend.
“Qeveria e djathtë italiane po përpiqet sërish të mbushë kampet e saj të dëbimit në Shqipëri”, shkruan Der Standard, duke shtuar se këtu nuk bëhet më fjalë vetëm për refugjatë që mbërrijnë me varka, por edhe për shtetas të huaj të dënuar apo të dyshuar për vepra penale në Itali.
Sipas gazetës, shumica e të deportuarve nuk ishin në dijeni të saktësisht se çfarë po ndodhte me ta gjatë transferimit. Ata u paraqitën si pjesë e një procedimi të zakonshëm për zhvendosim, ndërkohë që u dërguan në një kamp në territorin shqiptar, ku pritet të mbahen deri në përfundimin e procedurave për dëbim ose ekstradim.
Kjo marrëveshje e diskutueshme midis Romës dhe Tiranës është cilësuar nga ekspertët si një praktikë e diskutueshme ligjërisht dhe etikisht, duke ngritur shqetësime për të drejtat e emigrantëve dhe sovranitetin territorial të Shqipërisë.
Opozita shqiptare dhe organizatat për të drejtat e njeriut kanë reaguar ashpër, duke kërkuar transparencë dhe mbrojtje më të mirë për njerëzit e prekur nga këto politika të reja të migracionit transnacional.
Marrëveshja, e arritur pa konsultim publik dhe me transparencë të kufizuar, shton tensionet në rajon dhe ngre pikëpyetje mbi rolin e Shqipërisë në menaxhimin e krizës evropiane të migracionit.
