Presidenti i Partisë Demokratike të Kosovës (PDK), Memli Krasniqi, ka shprehur shqetësimin e tij të thellë lidhur me dështimin e përsëritur për konstituimin e Kuvendit të Kosovës, duke e quajtur situatën si të paprecedent për institucionet e vendit. Sipas tij, për herë të pestë, Kuvendi nuk ka arritur të zgjedhë kryetarin, ndërsa për herë të tretë është refuzuar kandidatura e Albulena Haxhiut nga radhët e Lëvizjes Vetëvendosje (LVV).
Krasniqi e konsideron këtë mungesë konsensusi si krizë të shkaktuar nga qasja e ngurtë e LVV-së, që sipas tij, po e mban peng procesin për shkak të insistimit mbi një emër të vetëm. Ai theksoi se në një sistem demokratik, votimi i përfaqësuesve nuk mund të ndodhë me imponim apo trysni, duke theksuar se deputetët e opozitës nuk mund të detyrohen të votojnë kundër bindjes së tyre.
Duke shfaqur gatishmërinë për bashkëpunim, Krasniqi tha se PDK është e hapur të votojë një kandidat të ri nga LVV nëse ai ose ajo nuk bart histori përçarëse dhe ka potencial për të unifikuar spektrin politik. Ai shtoi se edhe brenda grupit parlamentar të Vetëvendosjes ka kandidatë që mund të gëzojnë mbështetje më të gjerë.
Në këtë kuadër, Krasniqi paralajmëroi se qëndrimi aktual i LVV-së nuk është vetëm një refuzim për bashkëpunim politik, por përbën edhe një bllokadë institucionale që rrezikon funksionimin normal të shtetit dhe demokracinë parlamentare në Kosovë. Ai i bëri thirrje partisë në pushtet të reflektojë dhe të mos i nënshtrojë institucionet tekeve partiake.
