Dy shtetas të Kosovës, Ardit Kutleshi (26 vjeç) dhe Jetmir Kutleshi (28 vjeç), janë ekstraduar në Shtetet e Bashkuara të Amerikës, ku do të përballen me akuza të rënda për mashtrim dhe vjedhje të identitetit të qytetarëve amerikanë. Arrestimi i tyre u realizua në dhjetor 2023 në Kosovë, në koordinim me autoritetet amerikane, si pjesë e një hetimi të përbashkët për krim kibernetik.
Sipas aktakuzës së ngritur nga Distrikti Perëndimor i Pensilvanisë, dyshja ishin administratorë të faqes së internetit Rydox, e cila shërbente për shitjen e të dhënave të vjedhura personale, përfshirë informacionin e kartelave të kreditit. Autoritetet amerikane pretendojnë se të ardhurat e krijuara nga kjo faqe që prej vitit 2016 kanë arritur të paktën 230 mijë dollarë.
Prokurorët amerikanë theksojnë se Kutleshi kishin shitur të dhënat sensitive të mijëra qytetarëve amerikanë, të cilat më pas janë përdorur për të kryer mashtrime financiare dhe aktivitete të tjera të paligjshme. Nëse shpallen fajtorë, ata mund të përballen me dënime të rënda burgimi, përfshirë deri në 20 vjet për pastrim parash dhe dënime të tjera për mashtrim dhe vjedhje identiteti.
Gjithashtu, Departamenti i Drejtësisë ka njoftuar për sekuestrimin e afërsisht 225 mijë dollarëve në kriptovaluta nga llogari të lidhura me të dyshuarit. Në të njëjtin rast është përfshirë edhe shtetasi tjetër kosovar, Shpend Sokoli, i arrestuar në Shqipëri dhe që pritet të ndiqet penalisht nga autoritetet shqiptare.
Ambasada amerikane në Prishtinë vlerësoi ndihmën e autoriteteve kosovare, duke theksuar rëndësinë e bashkëpunimit ndërkombëtar në luftën kundër krimit kibernetik.
