Gazetari investigativ Ferdinand Dervishi ka hedhur dritë mbi një ngjarje alarmante, përmes një denoncimi publik të bërë në rrjetet sociale. Sipas tij, më 22 shkurt të vitit të kaluar, në pikën kufitare të Qafë Thanës, është ndaluar një automjet tip “Mercedes Benz”, pjesë e flotës së Agjencisë së Mbikëqyrjes Policore (AMP), e cila varet direkt nga Ministria e Brendshme.
Automjeti, që dyshohet se përdorej nga një drejtues i lartë i institucioneve të hetimit të brendshëm policor, u ndalua me dyshohet të forta për kontrabandë floriri. Gazetari Dervishi shoqëroi denoncimin me foto dhe dokumente, të cilat, sipas tij, tregojnë qartë përfshirjen e mjetit zyrtar në trafik të paligjshëm. Më shqetësues është fakti se ngjarja nuk u bë publike asnjëherë nga institucionet përgjegjëse, dhe nuk është raportuar as nga media zyrtare, çka sugjeron se mund të jetë fshehur me vetëdije.
Ky pretendim ngre pikëpyetje serioze mbi integritetin e strukturave të rendit dhe kontrollin që Ministria e Brendshme ushtron mbi agjencitë në vartësi të saj. Nëse akuza rezulton e vërtetë, bëhet fjalë për një abuzim të rëndë me funksionin shtetëror dhe përdorimin e mjeteve publike për qëllime kriminale.
Reagimi i autoriteteve deri tani ka qenë i heshtur, çka ka shtuar presionin ndaj organeve të drejtësisë dhe institucioneve të hetimit për të ndërmarrë një hetim të plotë dhe transparent. Publiku kërkon përgjigje: si është e mundur që një mjet zyrtar përdoret për trafik të paligjshëm dhe askush të mos mbajë përgjegjësi?
Sipas Dervishit, ky është vetëm një nga rastet që dëshmojnë komprometimin e thellë të sistemit të drejtësisë dhe rendit në Shqipëri.
