Kryeministri Edi Rama, gjatë një prezantimi të bilancit për infrastrukturën kombëtare, njoftoi vendosjen e një sistemi kamerash inteligjente për të zëvendësuar efektivët e policisë në rrugë. Sipas tij, ky sistem do të monitorojë rrugët në kohë reale dhe çdo shkelje e rregullave të qarkullimit do të identifikohet menjëherë, duke sjellë ndëshkimin elektronik në mënyrë direkte në iPhone-in e shkelësit. “Efekti do të jetë i jashtëzakonshëm në uljen e aksidenteve, sepse adrenalina do t’u kushtojë tepër shtrenjtë atyre që shkelin rregullat,” deklaroi Rama.
Sistemi i ri do të mundësojë jo vetëm matjen e shpejtësisë, por edhe identifikimin e personave me detyrime të pashlyera, duke forcuar kontrollin dhe disiplinën në qarkullimin rrugor. Trajnimi i stafit do të jetë një nga elementët kyç për operimin efikas të këtij sistemi, i cili vjen si pjesë e një projekti të përbashkët me Emiratet e Bashkuara dhe do të mbulojë shkollat, akset kombëtare dhe zonat urbane.
Sa i përket projekteve hekurudhore, kreu i qeverisë theksoi se janë bërë hapa të mëdha përpara. Linja hekurudhore Tiranë–Durrës, për të cilën aplikimi nisi që në vitin 2014, ka hyrë në një fazë të avancuar projektimi dhe financimi që prej vitit 2020. Rama vlerësoi se investimet në infrastrukturë të këtij niveli jashtë Bashkimit Evropian janë sfida të mëdha, por garantoi se projektet e tjera hekurudhore janë në progres.
Ai theksoi se përshpejtimi i këtyre veprave të mëdha do të ndodhë vetëm nëse Shqipëria bëhet pjesë e BE-së, duke përfituar fonde deri në 1 miliard euro në vit, 90% e të cilave në formën e granteve.
