Forcat izraelite kanë ndërmarrë një tjetër sulm ajror në Rripin e Gazës, duke goditur një shkollë që shërbente si strehë për palestinezët e zhvendosur nga luftimet e vazhdueshme. Sipas Agjencisë së Mbrojtjes Civile të Gazës, sulmi ndodhi në shkollën Dar al-Arqam në verilindje të qytetit, ku shumë familje kishin kërkuar mbrojtje nga bombardimet që prej fillimit të ofensivës. Të paktën 25 persona u vranë dhe mbi 100 të tjerë u plagosën, shumë prej tyre gra dhe fëmijë.
Zëdhënësi i Agjencisë, Mahmoud Bassal, deklaroi se sulmi ndodhi papritur dhe goditi një prej klasave të shkollës, ku civilët po strehoheshin natën. Sipas dëshmitarëve, ambulancat hasën vështirësi për të arritur në vendngjarje për shkak të rrugëve të dëmtuara dhe rrezikut të sulmeve të tjera, çka e bëri edhe më dramatik situatën e shpëtimit.
Autoritetet izraelite pretendojnë se sulmi kishte në shënjestër militantë të Hamasit që, sipas tyre, po fshiheshin në objektin e shkollës. Megjithatë, organizatat ndërkombëtare për të drejtat e njeriut kanë kërkuar një hetim të pavarur lidhur me rastin dhe kanë paralajmëruar për rrezikun e shkeljeve të rënda të të drejtave të civilëve.
Kjo ngjarje vjen në një periudhë përshkallëzimi të dhunës në Gaza, e cila ka pasur pasoja shkatërruese mbi popullsinë civile. Kombet e Bashkuara dhe Kryqi i Kuq e kanë përshkruar situatën humanitare si katastrofike, duke theksuar mungesën e furnizimeve mjekësore, ujit të pastër dhe strehimit të sigurt. Thirrjet për armëpushim dhe dialog ndërkombëtar po shtohen ndërsa numri i viktimave vazhdon të rritet.
