Pas humbjes në derbi kundër Milanit, te Interi është ndier fuqishëm zhgënjimi, megjithatë klima brenda klubit mbetet optimiste. Stafi drejtues dhe lojtarët besojnë se ky sezon mund të ketë një fund të suksesshëm, pasi ekipi është ende plotësisht në garë si në Serie A ashtu edhe në Champions League. Sfida e radhës ndaj Romës është vendimtare për të ruajtur distancën me Napolin dhe për të ruajtur ambiciet për titullin kampion.
Besimi ndaj trajnerit Simone Inzaghi është i plotë, pavarësisht luhatjeve në rezultate. Drejtuesit e Interit janë të gatshëm t’i ofrojnë atij rinovimin e kontratës, madje edhe nëse skuadra mbetet pa trofe këtë edicion. Vlerësohet mënyra si ai ka menaxhuar skuadrën dhe ka rikthyer konkurrencën në nivelet më të larta, ndërkohë që evolucioni i skuadrës është i dukshëm.
Në aspektin e merkatos, Mesfushori shqiptar Kristjan Asllani është duke u konsideruar për shitje në fund të sezonit. Megjithëse ka treguar shpesh potencial dhe dëshirë për të kontribuar, hapësirat në një skuadër me ambicie të mëdha kanë qenë të limituara për të. Inter synon ta përdorë largimin e tij për të krijuar hapsira financiare dhe për të rinovuar repartin e mesfushës.
Sezoni i Interit tashmë ndodhet në një moment kritik: mbështetja ndaj Inzaghi-t mbetet e palëkundur, ndërsa pritet një përqendrim maksimal në ndeshjet e ardhshme vendimtare për objektivat madhorë. Një fitore ndaj Romës do të ishte një sinjal i fortë se skuadra dhe tekniku i saj kanë kapur rrugën e duhur për të kërkuar lavdinë.
