Zgjerimi i Bashkimit Europian mbetet një ndër prioritetet strategjike të presidencës polake gjatë mandatit të saj. Në një konferencë të përbashkët për shtyp nga Luksemburgu, ministri i Jashtëm i Polonisë, Radosław Sikorski, theksoi se zgjerimi i bazuar në meritë është qasja e duhur për të forcuar unitetin dhe stabilitetin europian. Në praninë e kryeministrit Edi Rama dhe komisioneres për Zgjerim, Marta Kos, ai nënvizoi rëndësinë e kapitujve që hapen sot në kuadër të bisedimeve të anëtarësimit me Shqipërinë.
Sipas Sikorskit, këto kapituj janë jetikë për integrimin ekonomik të Shqipërisë në BE dhe përparimi i tyre reflekton përkushtimin e Tiranës ndaj reformave të qëndrueshme. “Ju përgëzoj, kryeministër Rama, për përparimin e bërë. Shumica dërrmuese e popullit shqiptar mbështet rrugën europiane dhe kjo është një shtysë pozitive për të gjithë ne,” tha ministri polak.
Ai vlerësoi gjithashtu kontributin aktiv të Shqipërisë në politikën e jashtme të përbashkët të BE, veçanërisht mbështetjen e vendosur ndaj Ukrainës, duke e cilësuar Tiranën si një partnere të besueshme. Komisionerja Marta Kos theksoi angazhimin e Komisionit Europian për të ruajtur ritmin e zgjerimit dhe për të mbështetur përmes fondeve dhe ekspertizës vendet e rajonit.
Ky zhvillim vjen në një moment kur rajoni i Ballkanit Perëndimor kërkon më shumë garanci për anëtarësimin në BE. Me këtë ritëm, vendet si Shqipëria po përforcojnë rolin e tyre politik dhe ekonomik në Europë, duke ndërtuar ura bashkëpunimi dhe zhvillimi të qëndrueshëm në përputhje me standardet e unionit.
