Humbja 2-0 ndaj Anglisë ishte një goditje për Shqipërinë, por sulmuesi Armando Broja theksoi se ekipi pati momente të mira dhe mund të kishte shënuar.
“E dinim që do të ishte e vështirë. Anglia është në nivelin më të lartë, me skuadra si Franca, Belgjika, Holanda dhe Spanja. Ata kanë kualitet të jashtëzakonshëm, por gjithçka është e mundur,” deklaroi Broja pas ndeshjes.
Një nga pikat kryesore të analizës së tij ishte mënyra sesi Shqipëria pësoi gola të evitueshëm. “Fatkeqësisht, gabimet tona u shfrytëzuan nga një skuadër kaq e fortë. Kemi pasur shanse për të shënuar, por nuk arritëm të konkretizonim. Kjo është diçka që duhet të përmirësojmë,” shtoi ai.
Broja vjen nga një periudhë sfiduese pas dëmtimit serioz që e mbajti larg fushave për një kohë të gjatë. Ai shpreson që ky vit të jetë një kthesë pozitive për të dhe për kombëtaren. “Po jap maksimumin tim dhe shpresoj të kaloj këtë vit të vështirë. Me më shumë punë dhe besim, do të arrij formën më të mirë,” përfundoi sulmuesi.
Shqipëria synon përmirësime për ndeshjet e ardhshme, duke nxjerrë mësime nga përballja me një nga ekipet më të forta të botës.
