Kreu i Aleancës për Ardhmërinë e Kosovës (AAK), Ramush Haradinaj, ka reaguar ashpër kundrejt qëndrimit të Nismës Socialdemokrate pas zgjedhjeve të 9 shkurtit, duke e cilësuar mbështetjen e saj për qeverinë aktuale si “një tradhti të turpshme”. Duke folur pas regjistrimit për seancën parlamentare të 15 prillit, Haradinaj theksoi se vendimi i Fatmir Limajt dhe partisë së tij për t’u distancuar nga opozita, ka bërë të pamundur krijimin e një shumice të re qeverisëse.
“Sjellja e tyre është mjaft e turpshme. Kemi kërkuar votë për ndryshim, por tani ata mbështesin pushtetin. Kjo ndarje nga ne, pa asnjë komunikim të mëparshëm, është një zhgënjim për përkrahësit,” u shpreh Haradinaj, duke iu referuar deklaratës së fundit publike të Limajt si momenti që ngrirë bashkëpunimin mes tyre.
Situata politike vazhdon të mbetet e paqartë në Kosovë, teksa Lëvizja Vetëvendosje (LVV), fituese e zgjedhjeve me 48 mandate, nuk ka arritur të sigurojë shumicën për të formuar qeverinë. Ndërkohë, edhe deputetët e Listës Serbe janë regjistruar për seancën, pa dhënë garanci për mbështetje ndaj emrit të mundshëm për kryetar të Kuvendit.
Deputeti Nenad Rashiq i Partisë për Liri, Drejtësi dhe Mbijetesë, u shfaq skeptik për krijimin e shpejtë të qeverisë. “Nuk jam optimist se do të votojmë nesër. Varianti më i mirë është që partia më e madhe, LVV, të marrë përgjegjësinë për formimin e qeverisë,” deklaroi ai, duke rikujtuar krizën e vitit 2014 si një paralel politik të mundshëm.
