Pas një fitoreje të vështirë ndaj Elbasanit, e cila erdhi në kushte sfiduese fizike për shkak të ndeshjes së gjatë kundër Kukësit në Kupë (120 minuta intensive), skuadra e Partizanit më në fund ka një periudhë të favorshme për rikuperim. Stafi teknik, i udhëhequr nga trajneri Ardian Gega, i cili ka sjellë menjëherë një frymë pozitive në grup, pret të rikuperojë plotësisht grupin e lojtarëve në ditët në vijim, ndërsa përgatitjet fokusohet totalisht tek përballja e rëndësishme e “Final Four”-it ndaj Egnatias më 5 maj, në orën 20:00 në “Arenën Kombëtare”.
Kjo periudhë pushimi dhe rigrupimi vjen në një moment të artë për të kuqtë, që kanë shfaqur probleme fizike vitin e fundit, sidomos në formën e lëndimeve të disa titullarëve dhe ngarkesës së madhe të ndeshjeve. Gega, i njohur për përgatitjen sistematike dhe aftësinë për të krijuar frymë uniteti, ka planifikuar kthimin në stërvitje me intensitet të moderuar, me qëllim rikuperimin gradual të lojtarëve kyç si Cara, Murataj dhe Mensah.
Trajneri beson se mund të ketë në dispozicion grupin e plotë për përballjen ndaj Egnatias, një duel që shihet si “finalja tjetër” për Partizanin në synimin për të siguruar një vend në arenën europiane në sezonin e ardhshëm. Gjendja e freskët fizike dhe morali i lartë pas rikthimit në rrugën e fitoreve janë faktorë që mund të bëjnë diferencën.
Koha punon në favor të të kuqve, që me Gega-n tashmë në krye, po rindërtojnë identitetin e tyre dhe dëshirojnë të mbyllin sezonin me sukses. Ndeshja ndaj Egnatias shihet si një moment kyç për ambiciet e tyre.
