Në një takim në qytetin e Shkodrës, Kryeministri Edi Rama vlerësoi rolin jetik të grave dhe vajzave në rrugëtimin e Partisë Socialiste. Ai theksoi se në këto dhjetëvjeçarë, është arritur të krijohet një ekuilibër i munguar prej kohësh mes burrave dhe grave në jetën publike dhe në politikë, duke rritur përfshirjen aktive të grave nga 12% në 40%.
Rama nënvizoi se gratë dhe vajzat përbëjnë sot motorin kryesor të forcës socialiste dhe janë pararojat e armatës së fitores që synon triumfin në zgjedhjet e 11 majit. Me krenari tregoi se në listat e mbylluara të kandidatëve, 52% janë gra dhe vajza, duke dëshmuar për angazhimin konkret të PS-së në drejtim të barazisë gjinore.
Gjithashtu, Kryeministri theksoi rëndësinë strategjike të zgjedhjeve të 11 majit, duke i bërë thirrje qytetarëve të mbështesin Partinë Socialiste për të siguruar vijimin e progresit drejt integrimit europian të Shqipërisë. Ai shprehu bindjen se në vitin 2027 vendi do të mbyllë me sukses negociatat për anëtarësimin në BE, por theksoi se për të arritur këtë, nevojitet një mbështetje e fortë popullore për të mos lejuar kthimin pas në kohët e errëta, të cilat Rama i përshkroi si “gropa të thella” të shkaktuara nga “bufi i kënetës”.
Me një mesazh frymëzues dhe një pjesëmarrje masive të grave dhe vajzave, takimi në Shkodër tregoi se për PS-në, gratë janë jo vetëm votuese të përkushtuara, por edhe forca kryesore drejt suksesit të qëllimeve shtetformuese.
