Flamurtari po përgatitet me përkushtim maksimal për sfidën vendimtare ndaj Vorës, takim që do të përcaktojë fatin e sezonit për skuadrën vlonjate. Kjo ndeshje, e cila do të luhet të dielën në orën 15:00 në stadiumin e Vorës, shihet si një “finale e madhe”, ku vendasit do të kurorëzohen si kampionë të Kategorisë së Parë, ndërsa Flamurtari kërkon me çdo kusht fitoren për të siguruar ngjitjen direkte.
Megjithatë, skuadra e drejtuar nga trajneri Migen Memelli është përballur me një problem të madh në prag të këtij takimi tepër të rëndësishëm. Kapiteni i skuadrës, Taulant Kuqi, ka pësuar një dëmtim gjatë një prej seancave stërvitore dhe rrezikon seriozisht të mos jetë në dispozicion për përballjen me Vorën. Në një ekip ku eksperienca dhe lidershipi i kapitenit ka pasur rëndësi vendimtare përgjatë gjithë sezonit, mungesa e tij përbën një goditje të madhe.
Gjithsesi, Flamurtari po përpiqet ta menaxhojë situatën me profesionalizëm. Stafi mjekësor është angazhuar maksimalisht për rikuperimin e Kuqit, ndërkohë që trajneri Memelli po përgatit edhe alternativa për zëvendësimin e tij, me synimin për të ruajtur balancat dhe peshën taktike të skuadrës.
Ndërkohë, grupi po kryen stërvitje të përditshme në kushte të qeta dhe të kontrolluara, larg presionit që shoqëron një përballje të këtij niveli. Seancat janë zhvendosur gjatë paradites në fushën sportive të qytetit, me qëllim për të shmangur ngarkesën psikologjike dhe për të ruajtur freskinë fizike të lojtarëve.
Mbetet për t’u parë në ditët në vijim nëse kapiteni Kuqi do të rikuperohet në kohë, por pavarësisht gjithçkaje, Flamurtari beson fort në objektivin e madh të ngjitjes në Superiore.
