Më 17 prill, në Gjykatën Themelore të Prishtinës ka nisur seanca e parë gjyqësore për rastin e sulmit të armatosur në Banjskë, Zveçan, që ndodhi në shtator 2023. Të pandehurit Vlladimir Tolliç, Bllagoje Spasojeviç dhe Dushan Maksimoviq po përballen me akuza për terrorizëm dhe cenim të rendit kushtetues të Kosovës.
Sulmi në Banjskë, ku mbeti i vrarë rreshteri i Policisë së Kosovës, Afrim Bunjaku, dhe tre sulmues të grupit të armatosur serb, është cilësuar nga autoritetet kosovare si akt terrorist i përgatitur nga Serbia. Përgjegjësinë për këtë sulm e mori Millan Radoiçiç, ish-nënkryetar i Listës Serbe, aktualisht në arrati në Serbi, së bashku me shumicën e anëtarëve të grupit.
Sipas Prokurorisë Speciale të Kosovës, të pandehurit kanë pasur role të ndryshme brenda grupit, nga financimi e drejtimi i veprimeve terroriste deri te pastrimi i parave. Aktakuza përfshin 34 dosje me prova konkrete, përfshirë incizime video, analiza të pajisjeve elektronike dhe dëshmi të ndryshme nga institucione ndërkombëtare.
Në seancën përgatitore të mbajtur më 9 tetor 2024, Tolliç dhe Spasojeviç refuzuan të deklarohen për fajësinë, ndërsa Maksimoviç deklaroi pafajësi. Vijimi i procesit për të pandehurit që ndodhen jashtë Kosovës ende është në pritje të vendimit të gjyqtarit Arben Hoti, pas kërkesës së Prokurorisë që gjykimi të zhvillohet edhe pa praninë e tyre fizike.
Ndërkohë, Serbia mohon çdo përfshirje në sulm, ndonëse komuniteti ndërkombëtar ka kërkuar me ngulm që autorët të vihen para drejtësisë. Rasti Banjskë mbetet një pikë e tensionuar në marrëdhëniet Kosovë-Serbi dhe një test për drejtësinë vendore dhe ndërkombëtare.
