Trajneri i Aston Villas, Unai Emery, u shfaq para mediave me entuziazëm dhe qartësi përpara përballjes me Paris Saint-Germain në çerekfinalet e UEFA Champions League. Ai e konsideroi këtë një mundësi të artë për klubin e tij dhe tha se skuadra është e gatshme të përballet me një nga rivalët më të fortë në Evropë.
“Do shijoj këtë çerekfinale,” u shpreh Emery, duke theksuar rëndësinë e momentit për klubin anglez. “Ne jemi këtu sepse e merituam. Do të përpiqemi të shfrytëzojmë çdo mundësi që kemi për të ecur më tej. PSG është një skuadër e madhe, me lojtarë të jashtëzakonshëm, por kemi besim tek vetja.”
Duke folur për rrugëtimin e Aston Villas dhe zhvillimin e klubit, tekniku spanjoll solli në vëmendje historinë e pasur të ekipit. “Klubi ynë është historik në botën e futbollit. E dija që në momentin që mbërrita në Birmingham për trashëgiminë që mbart Aston Villa. Tani është koha të tregojmë që jemi rikthyer në nivelet më të larta.”
Pavarësisht forcës së PSG-së, Emery theksoi rëndësinë e organizimit dhe përqendrimit. Ai potencoi se suksesi do të varet nga qasja taktike dhe nga vendosmëria e lojtarëve në fushë. “Ne nuk kemi frikë. Jemi përgatitur mirë dhe e dimë çfarë kërkon ky lloj niveli,” shtoi ai.
Për Emeryn, kjo sfidë nuk është thjesht përballje me një gjigand evropian, por edhe një provë karakteri për Aston Villan. Optimizmi dhe përkushtimi i tij mund të jenë një element kyç në tentativën e Villas për të shkruar histori në Ligën e Kampionëve.
