Së fundmi, Elon Musk ka ndezur një debat të gjerë në rrjetet sociale pas publikimit të një videoje në platformën “X”, ku thekson se Rusia dhe Shtetet e Bashkuara ndodhen jashtëzakonisht pranë njëra-tjetrës—vetëm 3.2 kilometra larg. Në postimin e tij, miliarderi thekson se shumë amerikanë nuk e dinë këtë fakt gjeografik, duke shtuar se “SHBA dhe Rusia janë aktualisht shumë pranë dhe madje edhe të lidhura.”
Bëhet fjalë për ngushticën e Beringut, që ndan Alaskën (SHBA) nga Gadishulli Çukotka në Siberinë e Lindjes së Largët (Rusi). Midis këtyre dy territoreve ndodhen dy ishuj të vogël: Diomede e Madhe (në anën ruse) dhe Diomede e Vogël (në anën amerikane), që janë vetëm 3.2 km larg njëra-tjetrës. Për ironi, mes tyre kalon edhe vija ndërkombëtare e datës, çka do të thotë se prej Diomedes së Vogël mund të shohësh praktisht “të nesërmen” në ishullin fqinj.
Postimi i Musk ka nxitur diskutime mbi marrëdhëniet aktuale SHBA-Rusi dhe rëndësinë strategjike të rajoneve gjeografikisht të largëta, por politikisht të ndjeshme. Disa e interpretojnë videon si një paralajmërim mbi tensionet e mundshme gjeopolitike, ndërsa të tjerë mendojnë se qëllimi është thjesht të rrisë ndërgjegjësimin për faktet gjeografike që shpesh injorohen.
Ky publikim vjen në një kohë kur marrëdhëniet mes dy fuqive janë të tensionuara për shkak të çështjeve ndërkombëtare si lufta në Ukrainë, siguria kibernetike dhe garat në hapësirë. Me këtë video, Musk nuk ka bërë komente të drejtpërdrejta politike, por ka lënë të kuptohet se afërsitë territoriale mund të kenë pasoja më domethënëse sesa mendohet.
