Partizani doli i mundur nga sfida ndaj Egnatias me rezultat 2-1, në një ndeshje ku nuk kanë munguar edhe problemet për kryeqytetasit. Përveç humbjes, skuadra e drejtuar nga Ilir Daja është përballur me shqetësime serioze nga ana fizike. Veçanërisht Agim Zeka, një nga lojtarët më në formë të fundit në repartin ofensiv, u detyrua të largohej që në minutat e para të ndeshjes pas një goditjeje të fortë.
Zeka iu nënshtrua ekzaminimeve mjekësore dje për të përcaktuar shkallën e dëmtimit dhe nëse do të arrijë të rikuperohet në kohë për ndeshjen e radhës kundër Bylisit, një duel i rëndësishëm për ambiciet e Partizanit në garën për titull. Stafi mjekësor nuk ka dhënë ende një verdict përfundimtar, por rikuperimi i tij do të jetë një garë kundër kohës.
Përveç Zekës, edhe një tjetër lojtar ka shfaqur shqetësime fizike, duke vënë në dilemë formacionin e Gegës për përballjen e ardhshme. Gjendja e lojtarit mbetet për t’u monitoruar gjatë stërvitjeve në ditët në vijim.
Këto ndalesa fizike vijnë në një moment delikat për skuadrën, e cila kërkon rikthimin te rezultatet pozitive dhe ruajtjen e ritmit në kampionat. Egnatia tregoi se është një kundërshtar serioz, por dëmtimet e kanë bërë disfata edhe më të hidhur për Partizanin.
Tashmë sfida nuk është vetëm në fushë, por edhe në infermieri. Rikuperimi i Zekës dhe të tjerëve mund të jetë vendimtar për vazhdimësinë e garës së “Demave të Kuq” në këtë sezon të Superiores.
