Kryeministri Edi Rama zhvilloi një takim të ngrohtë me diasporën shqiptare në Kretë, ku theksoi rëndësinë e zgjedhjeve vendore të 11 majit dhe bëri një thirrje të qartë për mobilizim kombëtar. Duke përdorur metafora si “ta braktisim bufin, ta braktisim kënetën”, Rama aludoi për një ndarje nga politikat e vjetra dhe figurat e konsumara, duke iu referuar së drejtpërdrejti Sali Berishës, të cilin e konsideron një pengesë për rrugëtimin europian të Shqipërisë.
“Të gjithë kuq e zi më 11 maj”, tha Rama, duke lënë pas ngjyrat partiake dhe duke kërkuar një votë në emër të së ardhmes europiane të vendit. Ai e krahasoi këtë moment me zgjedhjet e vitit 1992, duke u kujtuar shqiptarëve që në atë kohë shumë votuan për Partinë Demokratike jo prej bindjeve politike, por sepse ndjenë se ishte zgjidhja e duhur për atë kohë. Sipas Ramës, sot, 11 maji përfaqëson një tjetër pikë historike: një referendum për të vazhduar përpara drejt integrimit në BE.
Kreu i qeverisë theksoi se përkrahja nuk duhet parë si një akt partiak, por si një zgjedhje në funksion të një Shqipërie më të zhvilluar dhe europiane. Ai nënvizoi se progresi, stabiliteti dhe transformimi i vendit kërkojnë mbështetjen e të gjithë shqiptarëve, qoftë brenda territorit apo në diasporë.
Këtë mesazh e përcolli me emocione të forta nga Kreta, duke kërkuar që më 11 maj, shqiptarët të flasin me një zë – atë të bashkimit kombëtar në ngjyrat kuqezi dhe të ardhmes europiane.
