**“Nga deti, ajri dhe toka, diaspora do të dyndet në Shqipëri”, Berisha: 11 maji, fundi i Ramës! Shqiptarët i lindin nënat për t’i dalë zot Atdheut**
Kreu i Partisë Demokratike, Sali Berisha, ka zhvilluar një takim të rëndësishëm me shqiptarët e diasporës në Napoli, ku ka theksuar vendosmërinë për t’i dhënë fund qeverisjes së kryeministrit Edi Rama. Ai ka deklaruar se më 11 maj qytetarët do të ngrihen fuqishëm kundër qeverisë aktuale, duke e cilësuar atë si ditën e lirisë dhe rikthimit të demokracisë në Shqipëri.
Duke akuzuar Ramën për shkatërrimin e lirive themelore dhe rikthimin e censurës, Berisha ka vënë në dukje se qeveria aktuale po përdor teknologjinë, përfshirë edhe TikTok-un, për të heshtur të rinjtë kritikë ndaj regjimit. Ai ka kritikuar keqqeverisjen dhe e ka cilësuar regjimin aktual si një rrezik për të ardhmen e vendit, ndërsa ka bërë thirrje që çdo shqiptar të marrë përgjegjësinë për të mbrojtur demokracinë dhe të ardhmen e Shqipërisë.
“Shqiptarët i lindin nënat për t’i dalë zot Atdheut,” – tha ai, duke nënvizuar fuqinë dhe atdhedashurinë e popullit shqiptar. Sipas tij, diaspora do të luajë një rol kyç në këtë betejë politike dhe do të kthehet në Shqipëri për të mbështetur kauzën për demokraci dhe liri.
Ky mesazh i fortë i Berishës tregon se opozita është më e vendosur se kurrë për t’u përballur me regjimin aktual, duke kërkuar mbështetjen masive të qytetarëve në protestat e ardhshme.
