Dështimi i shtatë radhazi për konstituimin e Kuvendit të Kosovës vazhdon ta thellojë krizën politike në vend. Edhe pas tentimit të shtatë, kandidatja e Vetëvendosjes (LVV), Albulena Haxhiu, nuk arriti të marrë votat e nevojshme për postin e kryetares së Kuvendit, duke marrë vetëm 57 nga 61 vota të nevojshme. Kryesuesi i seancës, Avni Dehari, njoftoi se përpjekja e radhës do të bëhet të martën.
Afërsisht tre muaj pas zgjedhjeve të 9 shkurtit, Kuvendi mbetet i paralizuar si pasojë e mospajtimeve të thella midis LVV-së dhe partive opozitare. Subjektet politike më të mëdha, përfshirë PDK, LDK dhe AAK, kanë refuzuar të mbështesin kandidaturën e Haxhiut, të cilën e shohin si figurë përçarëse. Partitë opozitare paralajmërojnë se Vetëvendosje nuk ka votat as për formimin e Qeverisë së re, duke sugjeruar mundësinë e zgjedhjeve të reja.
Memli Krasniqi, kryetar i PDK-së, akuzoi LVV-në për “mbajtjen peng” të institucioneve për shkak të “tekeve” në lidhje me kandidatin për kryetar Kuvendi, ndërsa deputetja e LDK-së, Hykmete Bajrami, theksoi se pa një marrëveshje të gjerë politike, konstituimi nuk mund të realizohet.
Sipas analistëve, situata po i shkakton vendit pasiguri të thellë kushtetuese dhe politike. Ndërkohë, mbetet e paqartë nëse Vetëvendosje do ta rishikojë qëndrimin e saj ose do të kërkojë alternativa për zhbllokimin e ngërçit.
Procesi i formimit të institucioneve të reja është vendimtar për stabilitetin e Kosovës dhe Bashkimi Evropian ka bërë thirrje për përshpejtimin e tij.
