Detaje të reja kanë dalë në dritë lidhur me atentatin e ndodhur mbrëmjen e kaluar, ku katër persona mbetën të plagosur pas breshërisë së plumbave ndaj një automjeti në lëvizje. Ngjarja ndodhi pasi grupi ishte larguar nga një festë private. Sipas burimeve nga prokuroria, në makinën tip “Audi”, ndodheshin Arenc Stafa, një ish-badigard i njohur në Tiranë, së bashku me tre persona të tjerë.
Stafa, i cili ishte në timon në momentin e sulmit, është marrë në pyetje nga hetuesit. Në dëshminë e tij, ai ka deklaruar se nuk ka konflikte me askënd dhe se momenti i ngjarjes e ka zënë rastësisht. “Po shkonim në shtëpi pas një feste. Nuk kam probleme me njeri, jam i habitur se si ndodhi kjo”, ka thënë ai për hetuesit.
Ndërkohë që policia po vijon hetimet për të identifikuar autorët, ajo po përqendrohet edhe te të kaluarat e personave të përfshirë. Megjithëse Stafa mohon çdo lloj konflikti, burime të pa konfirmuara thonë se njëri prej të plagosurve mund të ketë qenë objektivi kryesor i atentatit.
Pavarësisht mospranimit të ndonjë konflikti nga personat në mjet, autorët e dyshuar duket se ishin të informuar për lëvizjet e tyre. Sulmi kishte karakter profesionist dhe ishte mirë i organizuar, gjë që ngre pikëpyetje mbi shkaqet reale.
Grupi hetimor aktualisht po kontrollon kamerat e sigurisë përgjatë rrugës dhe zonës ku ndodhi atentati, si dhe po analizohen tabulatet telefonike të viktimave potenciale. Situata mbetet e paqartë, por autoritetet shprehen se janë pranë identifikimit të personave përgjegjës. Hetimet pritet të zbardhin më shumë rreth motivit të atentatit ditët në vijim.
