Prokuroria belge ka paraqitur më 1 prill kërkesën për dënim me nga 20 vite burgim për Alfredo Hamzai dhe Indrit Kulaj, dy shqiptarë të dyshuar si drejtues të organizatës kriminale të njohur si “Shqiponja e zezë”. Ata akuzohen për drejtimin e një rrjeti të sofistikuar trafiku ndërkombëtar droge, pjesë e një operacioni të gjerë antidrogë në Belgjikë.
Hetimet, që kanë zgjatur më shumë se dy vite, kanë çuar në arrestimin e 34 personave të dyshuar si pjesëtarë të kësaj strukture kriminale. Sipas autoriteteve, grupi kishte ndërtuar një rrjet të ngjashëm me kartelët, duke përdorur mjete të koduara komunikimi dhe logjistikë të mirëorganizuar për shpërndarjen e drogës në disa vende të Bashkimit Europian.
Sipas prokurorëve, Hamzai dhe Kulaj kishin një rol kyç jo vetëm në drejtimin e operacioneve të trafikut, por edhe në strukturimin hierarkik të organizatës, ku zbatimi i urdhrave ishte strikt dhe i bazuar në frikë e disiplinë. Ata dyshohet gjithashtu se kanë pastruar miliona euro përmes bizneseve fasadë në disa vende europiane.
Ndërkohë, avokatët mbrojtës të të pandehurve kanë mohuar çdo përfshirje direkte të tyre në trafik dhe kanë kërkuar lirimin e menjëhershëm për mungesë provash. Megjithatë, provat e paraqitura nga hetuesit – përfshirë përgjime të shumta, dëshmi nga bashkëpunëtorë të drejtësisë dhe të dhëna bankare – cilësohen të fuqishme për çështjen.
Procesi gjyqësor pritet të vazhdojë në javët në vijim dhe vendimi përfundimtar për dy shqiptarët pritet të mbërri në fund të prillit. Rasti ka tërhequr vëmendjen e publikut për shkak të shtrirjes ndërkombëtare dhe profesionalizmit të grupit kriminal.
