Problemet në kampin bardheblu duket se nuk kanë fund. Pas një sezoni të vështirë, ku dëmtimet kanë shoqëruar vazhdimisht skuadrën, Tirana përballet sërish me një situatë shqetësuese, vetëm pak ditë para derbit me Dinamon. Në sfidën kundër Teutës, Shkëmbi detyrohet të bëjë një zëvendësim të parakohshëm për shkak të dëmtimit të mbrojtësit me përvojë, Gledi Mici.
Lojtari ndjeu shqetësime muskulore dhe nuk mundi të vazhdonte lojën, çka nxiti stafin teknik dhe mjekësor të reagojnë menjëherë. Sipas burimeve pranë klubit, priten ekzaminime të detajuara për të përcaktuar shkallën e dëmtimit, por shanset që ai të jetë gati për derbin janë minimale. Ky është një lajm i keq për bardheblutë, pasi Mici ishte ndër të paktët titullarë që kishte ruajtur vazhdimësinë gjatë sezonit të kaluar dhe konsiderohej një aset i rëndësishëm në repartin mbrojtës.
Në mungesë të Micit, Shkëmbi duhet të improvizojë në një ndeshje ku Tirana ka presion maksimal për të rikuperuar pikë dhe për të ruajtur prestigjin në derbi. Situata bëhet akoma më e rënduar duke marrë parasysh se disa lojtarë të tjerë janë ende në rikuperim ose nuk janë në formën optimale.
Një tjetër faktor shqetësues është ndikimi psikologjik i serisë së dëmtimeve te grupi. Lodhja fizike dhe presioni i vazhdueshëm për rezultatet duket se po faturohen në mënyrën më të keqe të mundshme. Me derbin që po afron, Tirana duhet të gjejë menjëherë alternativat e duhura dhe të mobilizohet si në aspektin taktik ashtu dhe emocional në mënyrë që të përballet denjësisht me sfidën që e pret.
