Pas fitores me rezultat 1-2 ndaj Bayern Munichut në stadiumin Allianz Arena, portieri i Interit, Yann Sommer, foli për rëndësinë e kësaj ndeshjeje, por njëkohësisht theksoi se asgjë nuk ka përfunduar ende. Në deklaratën e tij për CBS Sport Golazo, Sommer nënvizoi profesionalizmin dhe përqendrimin që skuadra duhet të mbajë për vazhdimin e rrugëtimit në Ligën e Kampionëve.
“Natyrisht ishte një fitore shumë e rëndësishme për ne, luajtëm shumë mirë dhe nga pikëpamja jonë ishte e rëndësishme. Kishim një moment të vështirë në pjesën e parë, por ia dolëm ta kalonim dhe të riktheheshim me forcë,” tha portieri zviceran.
Ai vlerësoi organizimin dhe disiplinën taktike të Interit, duke theksuar se skuadra ia doli të neutralizojë forcën e sulmit të Bayern Munichut, veçanërisht në momentet më delikate të pjesës së parë. Sommer ishte protagonist edhe me disa pritje vendimtare, që mbajtën rezultatin në favor të zikaltërve.
Megjithatë, ai nuk e la vetën të pushtohet nga entuziazmi. “Nuk ka mbaruar ende asgjë, është vetëm ndeshja e parë. Duhet të mbetemi të përqendruar dhe të vazhdojmë kështu. Kemi një ndeshje tjetër për të luajtur dhe cilësia e Bayernit është e tillë që mund të përmbysë çdo rezultat,” vijoi ai.
Deklaratat e Sommer tregojnë mentalitetin e pjekur të Interit dhe rëndësinë që i kushtohet ekuilibrit mes suksesit momental dhe qëndrueshmërisë afatgjatë. Me një avantazh të vlefshëm në çerekfinale dhe një skuadër të organizuar, Interi duket i gatshëm të sfidojë sfidat e radhës, por pa e ulur kurrë vigjilencën.
