Në emisionin “Të Paekspozuarit”, gazetarja investigative Ola Xama zhvilloi një debat të fortë me kolegen Klodiana Lala, lidhur me qëndrimin e SPAK ndaj transparencës dhe komunikimit me mediat. Shkak për këtij debati u bë ngjarja e fundit ku serverët e SPAK-ut u hakeruan, një incident i rëndë që ngre pikëpyetje serioze për sigurinë kibernetike në sistemin e drejtësisë shqiptare.
Sipas Xamës, mungesa e transparencës pas ngjarjes është shqetësuese dhe përforcon perceptimin se SPAK po pretendon të ketë “monopolin e së vërtetës”. Ajo u shpreh se struktura speciale kërkon t’i mbajë të fshehta informacionet kur i intereson, ndërkohë që sulmon gazetarët për publikimin e të dhënave që, në disa raste, vetë organet e drejtësisë i shpërndajnë në mënyrë selektive.
Duke ndjekur këtë logjikë, Xama vuri në dukje ngjashmëritë në qasjen ndaj mediave midis SPAK dhe kryeministrit Edi Rama, i cili shpesh është kritikuar për përpjekjet për kontroll të narrativës publike. Në të njëjtin debat, Lala e mbrojti SPAK-un, duke theksuar rëndësinë e mbrojtjes së sekretit hetimor dhe ndalimit të cënimit të proceseve gjyqësore në rrjedhën normale.
Megjithatë, Xama theksoi rëndësinë e balancimit midis transparencës dhe integritetit të hetimeve, duke rikujtuar se mediat kanë rol thelbësor në mbajtjen në kontroll të pushtetit. Në një sistem që pretendon të funksionojë mbi parimet e së drejtës dhe llogaridhënies, paqartësia dhe dy standardet nuk duhet të tolerohen.
Ky debat nxjerr në pah tensionet mes institucioneve të drejtësisë dhe mediave, por edhe nevojën për një dialog të sinqertë mbi kufijtë dhe përgjegjësitë e secilës palë.
