Mbrëmjen e djeshme, rezidenca luksoze “Long Hill” në Lundër u bë skena e një incidenti të rëndë, ku 19-vjeçari Kristi Fufi, djali i ish-deputetit Mhill Fufi, u dhunua me sende të forta brenda një lokali. Ngjarja ka tronditur opinionin publik, ndërsa policia ka bërë të mundur deri tani identifikimin e njërit prej autorëve.
Sipas burimeve zyrtare, 38-vjeçari Kliton Gj., një emër i njohur në botën e Call Center-ave, është identifikuar si agresori kryesor. Kliton rezulton të jetë drejtues i disa aktiviteteve të mëdha Call Center në Tiranë, me lidhje të forta në tregun e jashtëm, veçanërisht në fushën e marketingut dhe shitjeve telefonike.
Ndonëse autoritetet nuk kanë sqaruar ende motivet e sherrit, dyshohet se konflikti ka pasur lidhje me çështje personale, të cilat janë komplikuar dhe kanë degjeneruar në dhunë fizike brutale. Policia ka vijuar hetimet duke sekuestruar kamerat e sigurisë dhe duke marrë në pyetje dëshmitarët e pranishëm.
Kjo ngjarje ka nxjerrë në pah edhe njëherë problematikat që janë shfaqur vitet e fundit në industrinë e Call Center-ave në Shqipëri, ku figura të suksesshme në këtë sektor kanë qenë të përfshira në incidente kriminale. Aktualisht, Kliton Gj. është shpallur në kërkim, ndërsa policia po punon për kapjen e tij dhe dokumentimin e plotë të ngjarjes.
Rasti ka ngritur shqetësime të mëdha për sigurinë në zonat më të shtrenjta të Tiranës dhe ka krijuar diskutime të ashpra për imunitetin e personave me influencë ekonomike. Autoritetet kanë premtuar ndjekje të rreptë ligjore për të gjithë të përfshirët.
