Ndeshja e ardhshme në Ligën e Kampionëve mes Interit dhe Bayernit të Mynihut është shumë më tepër se një ndeshje e zakonshme për Benjamin Pavard. Mbrojtësi francez, i cili kaloi katër sezone të suksesshme me skuadrën bavareze, tashmë vesh fanellën zikaltër dhe është gati të përballet me të kaluarën e tij.
“Jam shumë i emocionuar që do të përballem me Bayernin. Kam kaluar katër vite fantastike në Mynih, fitova gjithçka që mund të fitohej dhe kam kujtime të paharrueshme. Por tani luaj për Interin dhe dua të jap gjithçka për këtë klub,” është shprehur Pavard.
Ky ballafaqim në Champions League përfaqëson një moment të veçantë emocional për lojtarin, por edhe një sfidë të madhe për Interin. Me objektiva të qarta në këtë kompeticion, Pavard thekson rëndësinë e mentalitetit fitues dhe angazhimit maksimal.
“Synojë të shkojmë deri në fund. Kemi një skuadër të fuqishme, me balancë perfekte mes përvojës dhe talentit të ri. E dimë që Bayerni është një nga favoritët, por edhe Interi ka treguar se mund të përballet me më të mirët,” tha francezi.
Forma e mirë e Interit në Serie A dhe harmonia e skuadrës japin optimizëm, ndërsa përballja me kampionët gjermanë do të jetë një provë e vërtetë për ambiciet evropiane të klubit italian. Me Pavard që njeh mirë stilin dhe pikat e forta të Bayernit, kjo ndeshje mund të jetë edhe një avantazh strategjik për ekipin e Inzaghit.
Në një duel ku emocionet personale ndërthuren me synimet e mëdha të skuadrave, Pavard mbetet i fokusuar: të ndihmojë Interin të ecë përpara në rrugën drejt finales së shumëdëshiruar.
