Në një kohë kur borxhi i bashkisë Roskovec vazhdon të rëndojë mbi buxhetin lokal, më 22 janar 2025 autoritetet vendore kanë hapur një tender prej 112 mijë e 500 eurosh për ndërtimin e një stacioni tregtar për makinat elektrike. Projekti i financuar nga fondet publike përfshin instalimin e tre “luleve smart”, struktura moderne që ofrojnë energji diellore dhe shërbejnë si njësi karikimi për automjetet elektrike.
Sipas kryetares Majlinda Bufi, ky investim synon të promovojë transportin e gjelbër dhe të krijojë infrastrukturë për një ekonomi më të qëndrueshme në Roskovec. Megjithatë, vendimi ka ngjallur polemika, pasi bashkia ndodhet aktualisht e zhytur në borxhe të akumuluara ndër vite. Specialistët e ekonomisë së qeverisjes lokale kanë theksuar se në situata të tilla prioritare duhet të jenë investimet për përmirësimin e kushteve bazë si uji i pijshëm, kanalizimet dhe mbështetja sociale.
Kontrovers edhe më i madh ka qenë deklarata e Bufit se në të ardhmen planifikohet ndërtimi i një karburanti në të njëjtin kompleks, duke ngritur pikëpyetje mbi koherencën e politikave për energjinë e pastër. Kjo ndërhyrje shihet si përplasje mes zhvillimit të gjelbër dhe interesave që lidhen me industrinë tradicionale të karburanteve.
Ndërkohë që stacionet private të karikimit ndërtohen nga vetë bizneset dhe individët që investojnë në këtë teknologji, ndërhyrja me fonde publike pa analizë të qartë të përfitimeve sjell debatin mbi prioritetet e administratës vendore. Shumë qytetarë të Roskovecit shprehen skeptikë mbi impaktin real të investimit dhe kërkojnë transparencë më të madhe mbi përdorimin e buxhetit të bashkisë. Pas kësaj lëvizjeje, sytë mbeten te eficienca dhe menaxhimi i projekteve që do të ndjekin.
