Dy kompani të fuqishme dhe të afërta me qeverisjen e Edi Ramës, “Salillari” dhe “2T”, kanë fituar një tender publik me vlerë rreth 2.5 milionë euro, i zhvilluar nga Bashkia Lezhë nën drejtimin e kryetarit socialist Pjerin Ndreu. Projekti, i lidhur me asfaltimin e disa rrugëve vendore, po cilësohet nga kritikët si një manovër e pastër elektoraliste që synon të ndikojë në zgjedhjet e ardhshme.
Kompania “2T” është në pronësi të vëllait të ish-komandantit të Gardës së Republikës gjatë qeverisjes së Rilindjes, Gramoz Sako, një figurë me ndikim të gjerë në strukturat shtetërore të sigurisë. Ndërkohë, “Salillari” është një nga kompanitë më të privilegjuara në dhënien e kontratave publike gjatë dekadës së fundit, shpesh në mungesë konkurrence reale apo me procedura të kontestuara.
Tenderi, sipas dokumenteve zyrtare, është fituar përmes një procedure të përshpejtuar dhe me kriterin e çmimit më të ulët, pa pasur transparencë të mjaftueshme për nevojat strategjike dhe emergjencën e punimeve.
Ekspertët e financave publike e konsiderojnë këtë veprim si një shembull tipik të “asfaltit elektoral” — investime infrastrukturore që planifikohen dhe aktivizohen në periudha zgjedhore për të gjeneruar mbështetje politike. Ky fenomen ka qenë i përsëritur në vitet e fundit në Shqipëri, sidomos në nivel lokal, ku kontratat i jepen shpesh subjekteve të njohura për lidhjet e tyre me pushtetin qëndror.
Akuza të tilla ngritin pikëpyetje serioze mbi integritetin e prokurimeve publike dhe shfrytëzimin e fondeve shtetërore për interesa partiake, në një kohë kur mbikëqyrja institucionale dhe transparenca mbeten sfida të mëdha.
