Pas barazimit zhgënjyes ndaj Crystal Palace, trajneri i Arsenalit, Mikel Arteta, ka zhvendosur vëmendjen te përballja e ardhshme me Paris Saint-Germain në gjysmëfinalen e Ligës së Kampionëve. Ai u shpreh se kjo është një mundësi ideale për skuadrën dhe tifozët që ta kthejnë mbrëmjen e së martës në një festë të paharrueshme sportive në “Emirates Stadium”.
“Jam i zhgënjyer me rezultatin kundër Crystal Palace, sepse prisnim më shumë, por tani duhet të përqendrohemi te ndeshja ndaj PSG. Le të luajmë të martën mbrëma së bashku, për të përjetuar një nga netët më të pabesueshme në Champions,” deklaroi Arteta.
Ai theksoi rëndësinë e mbështetjes së publikut, duke e cilësuar atë një element jetik në përballjet me peshë. “Pres shumë nga skuadra, por gjithashtu edhe nga tifozët. Ata na japin energji dhe besim. Së bashku mund të arrijmë diçka të madhe.”
Kjo është një prej netëve që mund të hyjë në histori për Arsenalin, që kërkon për herë të parë në dekada kualifikimin në finalen e Champions League. Arteta e kupton rëndësinë e momentit dhe kërkon përqendrim maksimal nga të gjithë faktorët: lojtarë, staf teknik dhe tifozëri.
Pritshmëritë janë të larta, jo vetëm për nivelin e kundërshtarit, por edhe për shkak të asaj që kjo ndeshje përfaqëson për të ardhmen e klubit. Një kalim në finale do të forconte pozitën e Artetës si lider vizionar i projektit të ri të Arsenalit dhe do të sjellte një ringjallje emocionuese në radhët e tifozëve “gunners”.
Së martës, “Emirates” do të jetë arenë e emocioneve, vendi ku ëndrrat ose realizohen, ose shtyhen për një tjetër sezon.
