Portieri i Real Madridit, Thibaut Courtois, ka folur me sinqeritet të plotë pas eliminimit të skuadrës së tij nga Champions League, në një përballje që përfundoi me fitoren e Arsenalit. Duke folur për Movistar Plus, belgjani pranoi se londinezët ishin më të mirë dhe meritonin të kalonin më tej.
“Sapo filloi ndeshja krijuam presion dhe rrezik, tifozët na dhanë mbështetje shumë të madhe. Megjithatë, Arsenali është një skuadër shumë e organizuar, veçanërisht në mbrojtje. E dinim që do të ishte e vështirë të kalonim përmes bllokut të tyre,” u shpreh Courtois.
Ai shtoi se skuadra madrilene kishte besim të madh në fillimin e ndeshjes dhe se shënimi i një goli të hershëm do të kishte ndryshuar gjithçka. “Në pjesën e parë menduam se nëse shënonim golin e parë, ndeshja do të ishte e hapur. Patëm disa raste, por nuk arritëm t’i shfrytëzonim.”
Courtois vlerësoi lart performancën e skuadrës së Mikel Artetës dhe veçanërisht mënyrën se si ata ishin në kontroll gjatë gjithë ndeshjes. “Ata na ndëshkuan me efikasitet, çdo gabim ynë u shfrytëzua në maksimum. Është e trishtë të dalësh nga Champions, por duhet të pranojmë realitetin: këtë herë, Arsenali ishte më i mirë.”
Ky eliminim shënon një tjetër dështim evropian për Real Madridin në më pak se tre edicione, me skuadrën që nuk ka arritur të shfaqë dominimin që e karakterizoi në dekadën e fundit. Megjithatë, Courtois theksoi rëndësinë e mbylljes së sezonit me sukses në La Liga, duke rikthyer vëmendjen tek objektivat e mbetur.
“Duhet të ngremë kokën. Champions mbaroi për këtë vit, por ne jemi Real Madrid. Duhet të vazhdojmë të luftojmë.”
