Armando Broja është gati për një kthesë të madhe në karrierën e tij te Everton. Pasi është rikuperuar plotësisht nga dëmtimi që e ka mbajtur jashtë fushave për një periudhë të gjatë, sulmuesi i Kombëtares shqiptare pritet të ketë më shumë hapësira nën drejtimin e trajnerit David Moyes. Everton përballet këtë fundjavë me Arsenalin dhe në prag të kësaj sfide të rëndësishme, Moyes ka lënë të kuptohet se Broja mund të jetë titullar.
“Mendoj se ka shumë kualitet të mirë, ka shpejtësi dhe mund të bëjë diferencën në sulm,” është shprehur trajneri skocez. Sipas tij, lojtari 22-vjeçar meriton më shumë minuta në fushë dhe ndeshja ndaj Arsenalit mund të jetë momenti për ta parë Brojën si titullar.
Kjo do të jetë një mundësi e artë për Brojën, që deri më tani ka pasur paraqitje sporadike me fanellën e Evertonit. Edhe pse minutat kanë qenë të pakta, ai ka treguar se mbetet një lojtar me potencial të madh, veçanërisht në sulm ku Everton ka pasur vështirësi për të gjetur zgjidhje të qëndrueshme.
Moyes, i cili ka një histori të gjatë me zhvillimin e talenteve të rinj, duket se po ndërton besimin te Broja. “Le t’i japim mundësinë të tregojë çfarë di të bëjë,” tha tekniku me përvojë, duke nënvizuar se është koha që sulmuesi shqiptar të marrë përgjegjësi në një sfidë të nivelit të lartë si ajo ndaj Arsenalit.
Nëse Broja starton, kjo mund të jetë nisja e një kapitulli të ri për të në Premier League dhe një ogur pozitiv edhe për Kombëtaren shqiptare.
