Në javën e dytë të fushatës zyrtare elektorale, kryeministri dhe kryetari i PS-së, Edi Rama, ishte në Shkodër në një takim me biznesin e vogël, shoqëruar nga kryebashkiaku Benet Beci dhe ministrja Delina Ibrahimaj. Gjatë fjalës së tij, Rama theksoi rëndësinë e investimeve në teknologji dhe infrastrukturë kulturore si motor zhvillimi për Shkodrën.
Ai nënvizoi se qeveria ka hyrë në një fazë të re, duke krijuar hapësira për të rinjtë në fushën e teknologjisë, si parku “Dyrana” ku regjistrimi realizohet online, dhe me projekte si baza në ndërtim në Vlorë dhe transformimi i Piramidës në TUMO Center, për të ofruar mundësira zhvillimi për të rinjtë dhe të rriturit.
Për Shkodrën, Rama përmendi projektin në bashkëpunim me Fondin Shqiptar të Zhvillimit për të krijuar hapësira të reja për artin dhe teknologjinë, duke shfrytëzuar objekte ekzistuese si godina e RTSH-së ose Uzina e Telit. Ai tha se këto investime do të kombinohen me traditën artistike të qytetit duke kontribuar në rritjen e turizmit dhe zhvillimin ekonomik.
Rama nënvizoi gjithashtu krenarinë se “para pak ditësh, Arkivi i Marubit u vulos si pasuri botërore”, duke e konsideruar këtë si një njohje ndërkombëtare të pasurisë kulturore të Shkodrës dhe të kontributit të saj në trashëgiminë botërore. Ky sukses është një reflektim i potencialit që ka Shkodra për të qenë një qendër e rëndësishme kulturore e ekonomike në Shqipëri dhe më gjerë.
