Pas publikimit të lajmit se disa mostra qumështi në Shqipëri përmbanin aflatoksinë të rrezikshme, Shoqata e Industrisë së Përpunimit të Qumështit dhe Shoqata e Blegtorëve Prodhues të Qumështit reaguan menjëherë. Në një deklaratë për mediat, ato hodhën poshtë pretendimet se produktet që qarkullojnë në treg janë një rrezik serioz për konsumatorët.
Shoqatat theksuan se testimet laboratorike janë bërë mbi baza shumë të kufizuara dhe pa respektuar standardet ndërkombëtare të analizimit. Sipas tyre, periudha e fundit me kushte të vështira klimatike mund të ketë ndikuar në përmbajtjen e aflatoksinës në lëndët e para, por situata është nën kontroll të plotë. Për më tepër, inspektimet e rregullta nga Autoriteti Kombëtar i Ushqimit kanë garantuar sigurinë ushqimore të qumështit të tregtuar.
Nga ana tjetër, shoqatat shprehën shqetësimin se publikime të tilla pa bazë të fortë godasin rëndë prodhimin vendas, duke dëmtuar imazhin e fermerëve dhe përpunuesve shqiptarë. “Në një kohë kur industria e qumështit përballet me sfida të fuqishme, këto lajme i japin goditje ekonomike dhe krijojnë panik të panevojshëm te konsumatorët,” thuhet në deklaratë.
Në këtë kontekst, ata kërkuan transparencë në komunikimin publik për të garantuar informimin e drejtë të qytetarëve, si dhe mbështetje nga institucionet për mbrojtjen dhe zhvillimin e prodhimit vendas të qumështit. Shoqatat po ashtu paralajmëruan se do të ndjekin procedurat ligjore ndaj çdo deklarate që dëmton në mënyrë të padrejtë industrinë kombëtare të qumështit.
