Gazetarja Klodiana Lala, e ftuar në emisionin “Të Paekspozuarit” në MCN TV, ka ngritur akuza të forta për mënyrën si është trajtuar çështja penale lidhur me aferën e inceneratorit të Tiranës. Sipas saj, dënimet e dhëna janë qesharake krahasuar me përmasat reale të skandalit. “U dënuan sikur vodhën një pulë,” tha ajo, duke nënkuptuar që drejtësia nuk ka arritur të prekë peshqit e mëdhenj.
Sipas Lalës, ajo që ka ndodhur me inceneratorët është një aferë me pasoja të mëdha financiare e mjedisore. Ajo thekson se miliona euro janë zhdukur në llogari offshore, ndërsa Shqipëria ndodhet sot përballë një emergjence mjedisore akute. Për më tepër, Lala denoncoi se mbetjet inerte po depozitohen në mënyrë të paligjshme në lumenj, duke rrezikuar shëndetin publik dhe biodiversitetin.
Përkundër denoncimeve të shpeshta dhe dëshmive që janë bërë publike, ndjekja penale ka prekur kryesisht figura të nivelit të dytë. Ndërkohë që përfituesit kryesorë, sipas gazetares, vazhdojnë të mbeten jashtë kontrollit të ligjit. Ajo thekson se ka munguar një hetim i thelluar për të ndjekur rrugën e parave dhe për të zbardhur lidhjet mes politikës dhe biznesit.
Për gjithë këtë situatë, Lala fajëson jo vetëm prokurorinë, por edhe mungesën e vullnetit politik për të përballur të vërtetën. “Nuk mund të flasim për drejtësi nëse nuk ndëshkohen ata që kanë nxjerrë miliona nga xhepat e qytetarëve,” u shpreh ajo.
Ky zhvillim ngren alarmin për nevojën urgjente të një sistemi drejtësie funksional që nuk frikësohet për të hetuar dhe ndëshkuar korrupsionin në nivelet më të larta.
